Arne M. Sølvberg er tildelt Kongens Fortenestemedalje i sølv

Arne M. Sølvberg frå Fjelli i Stryn kommune fekk går kveld tildelt H. M. Kongens Fortenestemedalje i sølv. Tildelinga skjedde i ungdomshuset Fjellvarden i samband med ein konsert for å markere at han Arne ”på Bøna” har runda 60 år. Det er Fjelljom Spelemannslag og med støtte frå Stryn kommune som står bak søknaden om utmerkinga..

Arne er fødd 30.11.1950. Han har gjennom eit langt og svært aktivt liv sett sterke spor etter seg i norsk folkemusikk, både lokalt, nasjonalt og internasjonalt. Arne M.Sølvberg har vore ein av dei sterkaste drivkreftene for utvikling av folkemusikken i landet vårt dei siste 30-40 åra.

Han tok utdanning gjennom forsvaret. Etter nokre år med arbeid i Oslo, flytte Arne heim og overtok farsgarden på Fjelli i 1979. Gjennom sin stå på vilje og sitt sterke engasjement for folkemusikken, både som spelemann, komponist, dansar og instruktør, kan vi trygt slå fast at Arne M. Sølvberg har vore ein svært sentral person i norsk folkemusikk dei siste 40 åra.

Eg vil også trekke fram Arne sitt store engasjement i samfunnsbygging og politikk. Han har vore aktiv sauebonde, politikar, lagsarbeidar og skribent.
Arne har vore musikalsk leiar for Fjelljom sidan 1979. Han også har vore administrativ leiar for laget mest heile tida. Fjelljom er einaste spelemannslaget i Stryn, og medlemane kjem frå dei fleste bygdene i kommunen.

Det Arne M. Sølvberg er mest kjend for, er aktivitet innan folkemusikk og dans.
Eg vil spesielt trekkje fram følgjande område der han har utført ein jobb av både nasjonal og internasjonal verdi:
- Han er ein av dei få A-klassingar i kappleiksystemet både på hardingfele, vanleg fele og dans
- Han har vunne Landskappleiken på vanleg fele i 1989, og dans, saman med kona i 2004
- Undervisning på Ole Bull-akademiet på Voss, vanleg fele
- Sensor ved eksamen, Musikkhøgskulen i Oslo og Ole Bull-akademiet på Voss
- Har vore i styret for Landslaget for spelemenn
- Har vore leiar i Rådet for folkemusikk og dans, Trondheim (2004-2007)
- Fekk Spellemannsprisen for CD-en ”Nordfjordslåttar”
- Nominert til Spellemannsprisen 1990 saman med Øyvind Lyslo for ”Syngande strenger”
- Fekk oppdrag frå Landslaget for spelemenn og Noregs Ungdomslag å lage ein melodi til Kong Olav sin 80-årsdag
- Kongeslåtten vart spelt utanfor slottet i Oslo 2. juli 1983, med 150 spelemenn
- Representert fleire departement og organisasjonar i utlandet ved ei rekkje høve

Innsatsen som Arne M. Sølvberg har lagt ned for folkemusikken generelt, står det svært stor respekt av. Han har gjennom sin innsats og sitt engasjement og sin produksjon lagt ned ein innsats av særleg stor verdi for utviklinga av folkemusikken i fylket og landet. Han er å sjå på som ein av dei fremste folkemusikarane i landet og Kongens fortenestemedalje i sølv er svært fortent. Eg ynskjer lukke til med arbeidet innan dans, folkemusikk og andre samfunnsområde.


Stryn 05.12.2010.


Nils Støyva
-ordførar-

Utbygging av vindkraft i Sogn og Fjordane.

Arbeidarpartiet og fagrørsla vil at energiforsyninga i Noreg skal vere den mest miljøvenlege i verda. Vi vil avgrense veksten i energiforbruket, og vi vil vere i fremste rekkje med å ta i bruk nye teknologi innanfor energiproduksjon og kraftforsyning. Noreg må ikkje gjere seg avhengige av import av forureinande kolkraft og atomkraft. Arbeidarpartiet og fagrørsla meiner at Noreg må ha som mål å minst vere sjølvforsynt med elektrisk kraft i år med normal nedbørmengde.
Land- og havbasert vindkraft kan bli eit nytt stort satsingsområde for Noreg. Sogn og Fjordane har størst produksjonspotensiale for vindkraftutbygging av alle fylke i Sør-Noreg. Havområda utanfor Stad har den høgaste vindhastigheita i landet med årsmiddelvind på 10,5 m/ps i 80 m/høgde
For at vårt fylke skal kunne ta del i vindkraft- og industriutviklinga, meiner vi at følgjande moment er avgjerande for å lukkast:

1. 420 kV linja mellom Ørskog og Fardal må få ei rask realisering for å sikre naudsynt nettkapasitet for vidare utbygging av småkraft og vindkraft.

2. Fylkeskommunen har i desse dagar ute på høyring ein fylkesdelplan for vindkraft. Det er viktig at det blir sett av stort nok område til vindkraftutbygging slik at det er realistisk å nå måla om utbygging av 1000-1500 MW vindkraft på land i Sogn og Fjordane innan 2025.

3. Utbyggjarar av vindkraft må i størst mogeleg grad nytte seg av lokale og regionale selskap. Dette for at ein skal kunne bygge opp kompetanse i fylket på m.a. prosjektering, bygging, drift og vedlikehald av vindparkar. Vindkraftselskap som vil byggje ut prosjekt i fylket skal vere etablert i fylket med eigen stab og organisasjon.

4. Det er naudsynt med målretta satsing på å byggje opp industriretta utdannings- og opplæringstilbod i Sogn og Fjordane knytt til vindkraft. Utdanninga må sjåast i samanheng med pågåande satsingar på Sikkerheitssenteret i Måløy og planlagt utbygging på Lutelandet.

5. Utvikling av framtidig vindkraft må sjåast i samanheng med utbygging av annan infrastruktur på kysten. Bygging av kystvegen mellom Bergen og Ålesund inkludert 45-minuttsregionen samt bygging av Stad skipstunnel er viktige for å oppnå sterke arbeidsmarknadsregionar. Dette vil også binde saman og kople kompetansemiljø slik at det kan realiserast storskala industrisatsingar på m.a. offshore vind.

6. For å lukkast med vindkraftsatsinga er ein avhengig av auka statlege løyvingar til realisering av test- og demonstrasjonsanlegg for ny offshore vindkraftteknologi, slik at det mellom anna er mogeleg å byggje opp industriell aktivitet knytt til testområda på Lutelandet og på Stadhavet.

7. Utbygging av vindkraft i fylket må sjåast i samanheng med andre industrisatsingar i fylket knytt til offshore vind m.a. innanfor kompositteknologi og samanstilling av offshore vindturbinar.

8. For å lukkast med vindkraftsatsinga må staten setje krav om elektrifisering av petroleumsanlegg på sokkelen i Nordsjøen. Dette kravet må ein sjå i samanheng med utbygging av offshore vindkraft.

Samarbeidskomiteen meiner Sogn og Fjordane si satsing på vindkraft kan medvirke til å utvikle eksisterande industri, leggje grunnlag for ein ny stor industri innan vindkraft, auke talet på arbeidsplassar, samt auke verdiskapinga i fylket. For å lukkast med denne satsinga må næringslivet, NHO, LO, kommunane og statleg styresmakter samarbeide tett. Berre på denne måten kan vi greie å løfte fram vindkraftutbygginga og den tilhøyrande industrien.


Med helsing

Nils Støyva Arvid Langeland
-fylkesleiar i Ap- -distriktssekretær i LO-

Dyrevelferd er viktig.

Det har i den seinare tid vore stort fokus på dyrevelferd. Vi har igjen fått avsløring på at deler av pelsdyrnæringa ikkje tek omsyn til dyra sine fundamentale behov. Vi har igjen sett groteske bilde av pelsdyr med avrivne bein, avkutta øyre og rompe samt store opne sår. Stygge og skremande bilde frå ei næring som ikkje tek omsyn til dyra sitt ve og vel.

På landsmøtet til Arbeidarparitet våren 2009 vart det etter ein lang debatt vedteke at dei statleg tilskotordningane til pelsdyrnæringa skulle halde fram. Dette trass i at innstillinga frå programnemnda var ei anna. Dei fleste i Sogn og Fjordane Arbeidarparti sin delegasjon stemde for at tilskotsordningane skulle halde fram. Omsynet til ei viktig distriktsnæring vog tungt for mange i delegasjonen frå Fjordafylket. Føresetnaden var likevel at behandlinga av pelsdyra skal skje med omsorg og respekt. Ved sjukdom og skade må dyra behandlast på ein langt betre måte enn vi har sett gjennom media dei siste dagane. Pelsdyra har sjølvsagt krav på forsvarleg hjelp og behandling ved sjukdom og skade. Pelsdyra må kunne leve eit verdig liv i eit trygt og godt miljø.

Mange av oppdrettarane tek dette på alvor. Men avsløringane den seinare tid har likevel avdekka at deler av næringa driv på ein skadeleg og ulovleg måte. Mattilsynet må følgje opp pelsdyrgardane med uanmelde inspeksjonar og kraftige reaksjonar overfor eigarar som ikkje følgjer loveverket. Dersom næringa ikkje ryddar opp i dette straks, ser eg ikkje anna råd ein at staten må ta bort alle støtteordningar til næringa eller vurdere å forby næringa. Vi kan ikkje leve med ei næring som påfører dyra store lidingar og set dyrevelferda i vanry.


Med helsing

Nils Støyva
-fylkesleiar, Ap-

Grytubakkahreppur - vennskapskommunen til Stryn på Nord-Island

Stryn kommune har sidan 1988 vore venskapskommune med Grytubakkahreppur/Grenivik på Island. Dette venskapssambandet har m.a. ført til at mange av Stryn kommune sine ungdomar opp gjennom åra har vitja Island og den vesle kommunen i nord. Vi har også fått besøk frå Island til Stryn kommune. Grytubakkahreppur er ein liten kommune med ca 350 innbyggjarar. Kommunen ligg 40 km nord for Akureyri. Kommunen ligg på 66. breiddegrad like sør for polarsirkelen. Kommunen er på 460 km2. Fiske og fiskeindustri er den viktigaste næringa. Det er fire havgåande båtar i kommunen. Landbruk er også ei stor næring i kommunen. Det blir dyrka gras og poteter. Storfe, sauer og hestar er dei vanlegaste husdyra. Mjølkeproduksjonen er viktig i kommunen, som har 30 gardsbruk i drift.

Vennskapskommunen er viktig fordi vi:
- kan få større forståing for språk og kultur på Island
- vil lære av våre venner på sagaøya
- kan sjå korleis andre løyser offentlege oppgåver
- kan utveksle studentar og anna arbeidskraft

Sommaren 2010 besøkte eg Island og Grenivik. På bakgrunn av besøket har eg laga denne presentasjonen.
http://www.stryn.kommune.no/Artikkel.aspx?AId=3474&back=1&MId1=1&MId2=&MId3=&

Samarbeid mellom kommunen og næringslivet i Stryn

Tradisjonelt har det vore eit tett og godt samarbeid mellom kommunen og næringslivet i Stryn. Dette samarbeidet er utvikla gjennom generasjoner. Professor på Vestlandsforsking, Oddbjørn Bukve, sa i ein forskingsrapport i 2001 følgjande om næringsutvikling i Stryn:"Stryn framstår som eit døme på at lokale handlingsval over tid har generert ein næringsstruktur og eit handlingsrom som er annleis enn i mange andre bygdekommunar som på 1950- eller 1960-talet var nokså like Stryn.””Gjennom ein vellukka industriutbyggings-strategi og satsing på reiseliv har lokale aktørar skapt eit sjølvberande næringsmiljø med evne til å konkurrere i fleire bransjar. Dette er resultatet av ei lang rekke handlingsval i kommunen, i det lokale næringslivet og i samspel mellom kommune og næringsliv. I Stryn kan vi seie at stor lokal handlingskapasitet over tid har auka det lokale handlingsrommet."I 2001 vart samarbeidsorganet ”samforum” fast etablert. Kommunen, næringshagen og Stryn næringssamskipnad møtest fast kvar sjette veke for å drøfte felles saker, prosjekt, planar m.m.Samforum har følgjande innhald: - koordinering og samordning av felles tiltak- utveksling av informasjon- uformell tenking/drøfting- orientering om søknader, invitasjonar og prosjekt - samordning av synspunkt på kommunale og fylkeskommunale planar- koordinering av framstøyt mot Staten, fylkeskommunen. Sjå elles følgjande informasjon på heimesidene til Stryn næringshage:http://www.stryn-nh.no/index.php?f=08050124&sid=3&eid=131&spid=268&id=10346

Nils Støyva
ordførar

Plasering av bustader for rusavhengige i Stryn sentrum

Eg har vore med i ei gruppe som har vurdert kvar Stryn kommune skal bygge fire små bustader for personar som har rusproblem. Dette er ei vanskleg sak som treng nøye vurdering. Vi har vurdert 10 ulike alternativt. Gruppa har i fellesskap vurdert at området ved Petterneset mot Stryneelva er det beste alternativet.

Plaseringa har følgjande positive og negative sider:

Positivt.
- Tomta er svært sentral, med enkel tilkomst for sosialetaten og andre offentlege instansar
- Tomta (gbnr 57/48) er kommunalt eigd, og kan realiserast raskt.
- Plasseringa har eit relativt lite potensiale for nabokonfliktar.
- Tiltaket er langt på veg i samsvar med godkjent reguleringsplan.
- Området blir jamleg trafikkert av offentleg tilsette, og av patruljerande nattugler.
- Tiltaket vil medføre ei visuell opprusting av området, føresett at bygget får ei god
utforming, samt at planlagt parkområde mot elva blir tilstelt/opparbeidd.

Negativt.
- Nokre kan meine at den sentrale plasseringa, og nærleiken til elva gjer tomta så attraktiv
at den burde reserverast til eit ”større” prosjekt. På den andre sida høver tomtestorleiken
på 0,6 dekar godt til prosjektet.
- Det kan vere ei utfordring å lage skjerma inngangsparti til kvar bueining.
- Som ein konsekvens av at området ikkje ligg tett på anna busetnad, blir brukarane også
noko meir eksponerte.

Du kan lese meir om dette på følgjande side:
http://www.stryn.kommune.no/Artikkel.aspx?AId=3458&back=1&MId1=1&MId2=&MId3=&

Nils Støyva
ordførar

Reiseliv er ei vekstnæring

Vi er midt inne i den mest hektisk tida for reiselivet i fylket. 2010-sesongen ser ut til å bli noko betre enn sesongen førre år, men det tek enno litt tid før næringar når gjestedøgntala frå eit par år sidan.. Alle solemerke tilseier likevel at reiselivet vil vere ei vekstnæring i åra framover. Årsaka til dette er at vi får betre økonomi både nasjonalt og globalt. Fritida vår vil auke. Vi får større behov for auka fysisk aktivitet, gjerne ute i naturen. Det er elles verdt å merkje seg at reiselivet er ei global næring der destinasjonane på Vestlandet i større og større grad må konkurrere med reisemål ute i Europa og i andre verdsdelar.
Fylkestinget vedtok i juni månad ein ny reisereiselivsplan for Sogn og Fjordane. Planen er utarbeidd i samarbeid med næringslivet i fylket. Planen byggjer på prinsippet om partnarskap og er eit felles verkty for å utvikle og gjere ressursane for næringa meir tilgjengelege.Fylket vårt har rike tradisjonar for reiselivet. Desse tradisjonen strekkjer seg tilbake til 1800-talet då dei første utanlandske turistane kom til fjordane, fjella og bygdene våre. Dei viktigaste attraksjonane våre har heile tida vore den storslagne naturen vår. Det er i hovudsak fjordane og breane den tradisjonelle reiselivskunden oppsøkjer. Den beste dokumentasjonen på dette er at ”National Geographic Traveller Magazine” har kåra fjordane våre som det beste uberørte reisemålet i verda!
Reiselivsplanen inneheld sju strategiar med tilhøyrande tiltak for utvikling av reiselivet i fylket. I stikkordsform er dette følgjande strategiar: Samhandling, berekraft, produktutvikling, verkemiddelbruk og private investeringar, infrastruktur, marknadskommunikasjon og kunnskap og kompetanse. Sett frå min ståstad er følgjande strategiar eller satsingsområde dei viktigaste:
Marknadskommunikasjon
Skal vi få vekst i reiselivet og fleire overnattingsdøgn, må vi bruke meir ressursar på marknadsføring. Samstundes er det viktig at vi skaffar oss meir marknadskunnskap slik at vi i større grad kan prioritere mellom dei ulike marknadssegmenta. Vi må velje marknadssegment som gir betre inntening. Vi må også i større grad spisse bodskapen vår og få betre fram det vi er særskilt unike på.
Produktutvikling
I arbeidet med produktutvikling må vi i større grad prioritere det vi er gode på. Vi må utnytte våre komparative fortrinn. Det er viktig å kunne sjå naturopplevingar i samanheng med kulturopplevingar og mattradisjonar. Kulturopplevingane må tilpassast reiselivskunden sine ynskje. Breane og fjordane har eg tidlegare nemnt. Nasjonalparkar, verdsarvområde, nasjonale turistvegar, og hav- og kystoppelevingar er alle viktige produktområde for vårt fylke som må utviklast vidare. Ein sentral del av produktutviklinga er å arbeide målmedvite med kvalitetssikring. Erfaringa viser at det er verksemder med høg kvalitet i alle ledd som vinn fram i marknaden.
Kunnskap og kompetanse
Eit anna viktig tema er å tilføre næringa kompetanse. Næringa må i sterkare grad knytast opp mot kunnskapsmiljøa på universitet og høgskular. Det er viktig at det vert laga eit betre system for overføring og utnytting av tilgjengeleg kunnskap. Gjennom auka kunnskap må vi bli betre på marknadsføring, tilrettelegging og utøving av vertskapsrolla. FoU–miljøa, verkemiddelapparatet og næringa må koplast tettare saman. Eit eksempel på dette er NCE-prosjektet (Norwegian Center of Expertise Tourism) som vert gjennomført i regi av Fjord- Noreg. Dette er ei langsiktig satsing som nettopp skal sjå næring og kompetanse i samanheng.

Den noverande raudgrøne regjeringa har auka løyvingane til internasjonal marknadsføring dei siste åra. Dette er bra, men det er enno langt att før vi når nivået til land vi i konkurrerer om reiselivskundane med. I Soria Moria II erklæringa heiter det: ”Regjeringen vil styrke kunnskapen om Norge som reisemål og forsterke arbeidet med merkevarebygging og marknadsføring av Noreg som reisemål i inn- og utland.”. Dette må følgjast opp med konkrete tiltak. Reiselivsplanen for Sogn og Fjordane er eit viktig styrande dokument for å følgje opp Regjeringa si satsing på reiseliv.Reiseliv er ei næring som krev langsiktig og strategisk arbeid. Det er difor viktig å gi bedriftene og destinasjonsselskapa stabile rammevilkår over tid. Det er berre gjennom langsiktig arbeid vi kan greie å auke tal gjestedøgn og få til meir aktivitet i vinter- og skuldersesongane. Dette vil igjen auke verdiskapinga i næringa og gje grunnlag for fleire arbeidsplassar.

Med helsing

Nils Støyva
-fylkesleiar i SF Ap-

Eit arbeid til å leve av.

Kommunal sektor har mange utfordringar i tida framover. Ein av dei største er nok å rekruttere arbeidskraft til pleie- og omsorgsektoren. Berre i min eigen kommune skal vi erstatte om lag 60 personar som går av med pensjon dei næraste åra. Dei fleste av desse er kvinner. Årsakene til at det vanskeleg å rekruttere er mange. Eg kan nemne: Låg løn, fysisk tungt og stressande arbeidsmiljø og svært mange deltidsstillingar. Over halvparten av dei som arbeider i omsorgssektoren er faktisk tilsette i små deltidsstillingar. Det fleste av desse er kvinner. Ein del kvinner ønskjer å arbeide i deltidsstillingar, men mange har søkt om å få større stillingar år etter år utan å vinne fram med krava sine. Arbeidssituasjonen vert av denne grunn uryddig og vanskeleg. Det er heller ikkje mogeleg å leve av inntektene frå ei lita deltidsstilling. Svært mange tek ekstravakter og arbeider meir enn i det stillingsstorleiken skulle tilseie, men det er altså vanskeleg å få fast tilsetting i heile stillingar.

Årsakene til at kommunane opererer med så mange deltidsstillingar er m.a. dårleg kommuneøkonomi, lav grunnbemanning, ubekvem arbeidstid, organisering og opplegg med turnusordningane og trong for eit visst tal personar for å fylle opp vaktene. Det er viktig at kommunane og fagorganisasjonane arbeider saman for å få fleire heile stillingar. Nye turnusordningar må prøvast ut for å sjå om dette kan vere eit verkemiddel for å få ned tal deltidsstillingar. Like eins må det arbeidast aktivt for å kombinere stillingar på ulike fagfelt. Det også viktig å kunne auke grunnbemanninga.

Høgre har denne våren fremma eit lovforslag i Stortinget om å endre arbeidsmiljølova slik at lokale tillitsvalde kan ta avgjerder og lage alternative lokale turnus- og vaktordningar. Dette er svekking av dei fagleg rettane og kan ikkje aksepterast. Både samfunnet generelt og arbeidsgjevarane sine haldningar til ”kvinnearbeid” er eit anna viktig område som må endrast. Tradisjonelt sett er det kvinna som arbeider deltid. Dette er eit resultat av ”forhandlingar i parforholdet” og økonomiske tilhøve. Kvinna har i mange tilfeller den lågaste inntekta og vel sjølv å redusere stillinga si i lange periodar. Difor er det viktig også i eit likestillingsperspektiv å innføre heiltidsstillingar i mykje større grad enn det som er dagens praksis. Sogn og Fjordane Arbeidarparti har teke opp utfordringar med deltidsstillingar ved fleire høve, sist på fylkesårsmøte i 2010. Sjølv tok eg opp saka på siste landsstyremøte i Arbeidarpartiet. Vi kan rett og slett ikkje tilby nyutdanna ungdom små brøkstillingar som det ikkje er mogeleg å leve av.

Nils Støyva
-fylkesleiar-

Regjeringa har greidd å halde oppe full sysselsetting

Den raudgrøne regjeringa med Jens Stoltenberg i spissen har lukkast med den økonomiske politikken. I mange land i Europa har arbeidsløysa vakse til over 10 %. I Noreg har vi derimot ei rekordlåg arbeidsløyse. Arbeidsløysa er faktisk lågare enn den nokon gong ha vore dei siste 20 åra. Landet vårt har også klart seg svært godt gjennom finanskrisa som har ramma verda. Fleire land i Europa opplever dei sterkast økonomiske tilbakeslaga på 70 år.
Gjennom alle desse brotsjøane, har Jens Stoltenberg (Ap) ført ein ansvarleg økonomisk politikk. Under finanskrisa for eit års tid sidan vart oljepengane brukte målmedvite for å bekjempe finanskrisa og arbeidsløysa. Næringspolitikken samt budsjett- og inntektspolitikken har vore med på å legge grunnlaget for denne utviklinga. Eller som finansminister Sigbjørn Johnsen seier: Vi må legge til sides pengar i gode tider, som vi kan tære på i dårlegare tider.

Sett frå min ståstad er det viktig å skape verdiane før dei vert omfordelte til fellesskapen.
Gjennom ein vellukka økonomisk politikk har ein trass nedgangstider greidd å ta vare på og auke verdiskapinga i samfunnet. Dette er grunnlaget for kunne løfte fram ein politikk bygd på solidariske fellesskapsløysingar.

Samferdsle
Ein viktig del av den skapande politikken er Regjeringa si formidable satsing på opprustning av veg, jernbane og annan infrastruktur. For første gang blir Nasjonal Transportplan følgt opp gjennom dei årlege løyvingane i statsbudsjettet. Det er gjennomført eit taktskifte i samferdselspolitikken. Gjennom å ruste opp infrastrukturen vil kvardagen for meg og deg bli lettare. Dette vil også betre miljøet og styrke næringslivet si konkurransekraft og verdiskaping gjennom å få ned transportkostnadene.
Satsinga på kollektivtransport og jernbane vil bli særleg sterk i og omkring dei største byane, mens løyvingane til vegbygging vil vekse, særleg i distrikta. Det er også viktig å understreke trongen for å satse på dei mjuke trafikantane gjennom bygging av gang- og sykkelvegar. Nullvisjonen for tal drepne i trafikken vil vere styrande for alle delar av transportsektoren.Trass i auka vegløyvingar, er det framleis mykje som står att av manglande samband og standard på vegnettet. Etterslepet på vedlikehaldet er eit alvorleg problem. Like eins må innsatsen for trafikktryggleik og rassikring haldast oppe. På halvårskonferansen til Regjeringa i 2010 sa statsministeren at dårleg vegnett er dårleg samfunnsøkonomi. Han la også til at løyvingane må haldast oppe og auke i tida framover.

Næringspolitikk
Næringspolitikken er ein viktig føresetnad for å kunne halde oppe full sysselsetting for å kunne auke verdiskapinga. Delar av industrien slit framleis med verknadene av finanskrisa. Særleg har verftsindustrien og deler av den maritime næringa hatt store utfordringar. For å betre rammevilkåra for desse næringane kom Regjeringa denne våren med ein tiltakspakke som har blitt godt motteken.

Rammevilkåra for den kraftforedlande industrien er ei anna viktig utfordring i Sogn og Fjordane. Lokalsamfunn som Svelgen, Høyanger og Årdal er heilt avhengige av at denne industrien utviklar seg positivt. Hydro og Elkem er bærebjelken i desse lokalsamfunna. Nedgangen i talet på industriarbeidsplassar i fylket dei siste åra har vist at det er naudsynt å rette fokus mot utvikling av denne næringa.
For å få nye investeringar i denne industrien må det leggast til rette for langsiktige industrikraftkontraktar på same vilkår som fleire EU-land allereie har. Vi må også få utvida støtteordningar for energieffektivisering. I tillegg må industrien sikrast like CO2 kvotereglar.
Dette for å unngå karbonlekkasje og auka globale CO2 utslepp. Det er viktig at Noreg har dei same kompensasjonsordningane og konkurranse vilkåra som den tilsvarande industrien i EU- landa.

Rammevilkåra for gründerar og nyetablerar er eit fagfelt Næringsminister Trond Giske har teke tak i denne våren. Næringsdepartementet har gjennomført ei undersøking av personar som har starta ei bedrift i løpet av siste året. Denne peikar på at vi har eit for komplisert regelverk og eit for stort skjemavelde for nyetablerar. Like eins har vi avgrensingar i rettar til sjukepengar og for strenge krav til revisjonsplikt. Trond Giske har sagt at han vil ta tak i desse utfordringane og betre rammevilkåra for gründerar og nyetablerar.

Siste tida har det i fleire saker blitt retta sterk kritikk mot Regjeringa. Særleg har FRP kome med mykje svartmåling. Av og til kan ein få inntrykk av at vi lever i eit underutvikla u-land som er ”skakkøyrt” på alle område. Denne svartmålinga og den negative skildringa fell på sin eigen steingrunn. Trass i at det er mange politiske utfordringar på fagfelt som utdanning, energi, helse- og omsorg, har Regjeringa styrt landet vårt på ein god måte. Ein vellukka økonomisk politikk med svært låg arbeidsløyse er den beste dokumentasjonen på dette.

Med helsing

Nils Støyva
-fylkesleiar i Ap-

Det er viktig å ha låge kommunale avgifter.

På grunnlag av KOSTRA-tal og ei undersøking frå Huseigaranes Landsforbund, presenterte NRK Sogn og Fjordane den 07.07.2010 ei liste over dei kommunale avgiftene i Sogn og Fjordane. Oversikta syner kor mykje kommunane krev i kommunale avgifter - det vil seie avgifter for vatn, kloakk, renovasjon og feiing.

I denne undersøkinga ligg Stryn på 5. plass i fylket. Resultatet for dei fem kommunane i fylket med rimlegaste avgifter samt alle Nordfjordkommunane følgjer under:

Årdal kommune kr 7178
Naustdal kommune kr 8114
Flora kommune kr 8629
Lærdal kommune kr 9163
Stryn kommune kr 9189
…………..
Eid kommune kr 10288
Bremanger kommune kr 10859
Selje kommune kr 10887
Gloppen kommune kr 10893
Vågsøy kommune kr 12340
Hornindal kommune kr 12848

Eg er nøgd med at Stryn ligg på 5. plass i fylket i denne undersøkinga. Likevel har vi utfordringar på dette fagfeltet i tida framover. Det er ingen grunn til å kvile på ”laurbæra”.
Vi må sjølvsagt framleis arbeide for å finne gode og tenelege løysingar på desse tekniske fagområda. Det er viktig å halde kostnadssida nede slik at innbyggarane får gode tenester til ein rimelegast mogleg pris.
Statistikken er ikkje fullstendig. Den gir ikkje oversikt over barnehageprisane og prisane på skulefritidsordninga. Storleiken på eigedomsskatten kjem heller ikkje fram. Det er viktig å ta desse elementa med i vurderinga av skatte- og avgiftsnivået i dei ulike kommunane. Statistikken seier heller ikkje noko om kva kvalitet tenestene har.

Elles er det verd å merke seg at avgiftene på desse tenestene skal bygge på sjølvkostprinsippet. Over tid skal det såleis vere balanse mellom utgifter og inntekter på desse områda.
Kommunane har såleis ikkje høve til å auke avgiftene for å finansiere andre kommunale tenester. Med andre ord kan kommunane ikkje ”sko seg” på høge gebyr og avgifter.

Under kan Du lese meir om undersøkinga:
http://www.nrk.no/nyheter/distrikt/nrk_sogn_og_fjordane/1.7199015
http://www.huseierne.no/Nyheter/Kommunale-gebyrer-opp-55-prosent-/

Stryn 08.07.2010

Nils Støyva

-ordførar-

Fjernvarme gir rein energi

Onsdag 07.07.2010 hadde underteikna innlegg på årsmøtet til Sogn og Fjordane Skogeigarlag. Etter ei generell orientering om Stryn kommune, gav ei grundig innføring i drifta ved Stryn Fjernvarme.
I innlegget mitt stilte eg følgjande spørsmål: Kvifor meinar eg at eit fjernvarme/biobrenselanlegg er (var) viktig for Stryn?
•Stor tilvekst (45.000 m3)av skog som ikkje blir avvirka (10-15.000m3)
•Mykje kapp og hun frå treindustri og sagbruk blir ikkje utnytta
•Energi er ein knappheitsfaktor •Fjernvarme er ei fornybar energikilde •Stryn v.g. skule kunne spare investeringar
•Kutte ut oljefyring i 16 bygg i sentrum og dermed spare utslepp av klimagassar
•Truleg er eit fjernvarmeanlegg i Stryn sentrum det mest effektive miljøtiltaket Stryn kommune kan sette i verk

Resten av innlegget kan du lese på heimesida til Stryn kommune:
http://www.stryn.kommune.no/Artikkel.aspx?AId=3450&back=1&MId1=467&MId2=&MId3=&

Stad skipstunnel

Samferdsle og kommunikasjon er ei av dei sakene som engasjerer mest på Vestlandet. Stad Skipstunnel er i ei særklasse blant desse. Prosjektet ber i seg element av miljøgevinst, arbeidsmarknadsbygging, kollektiv transport, tilrettelegging av ”gods til sjø”, mulegheita for næringsliv og reiseliv mv. Prosjektet er i tillegg av ein slik art at det truleg vil vere ein verdssensasjon som vil sette Noreg på kartet på ein svært positiv måte.

Saka må ut av dei byråkratiske skuffene.

Arbeidarpartiet sine fylkesparti på Vestlandet har gjennom årsmøtevedtak eller andre vedtak gitt si klare tilslutning til bygging av Stad Skipstunnel.

I NTP 2010-2019 er det sett av 200 mill. kr. i startløyving. Det er ein føresetnad for oppstart at KS1 viser at prosjektet har positiv samfunnsmessig nytte. Kystverket har i si Konseptvalsutgreiing av november 2007 konkludert med at prosjektet (stor versjon) er nær balansepunktet for positiv kost/nytte faktor før verknaden av nærings- og reiselivsrelaterte tilhøve er lagt inn.

På denne bakgrunn har Stortinget bede om at prosjektet vert eksternt kvalitetssikra gjennom ein såkalla KS1-gjennomgang. Denne gjennomgangen må vere avslutta før Stortinget kan ta endeleg avgjerd i saka.

Nemnde KS1-utgreiing av Kystverket si konseptvalsutgreiing (KVU) skulle vere ferdig innan 2009. Dette skjedde ikkje.

4 månader seinare melder Fiskeridepartementet at saka må attende til Kystverket for vidare utgreiing (altså: ny runde med KVU). Denne nye runden med utgreiingar har skapt stor frustrasjon blant folk på Vestlandet. Alle oppfattar utspelet som nok ei utsetting av ei sak som er til dei grader overutgreidd.

Det folk på kysten av Vestlandet fryktar er at det no er lagt opp til ein prosess der ein nok ein gong skuvar denne viktige saka ut i ei uviss framtid.

Tidlegare regjeringar sit med eit stort ansvar for manglande framdrift i dette prosjektet. Arbeidarpartiet har teke tak og sørga for framdrift i saka. Men saka må ikkje no stoppe opp ved at den vert sendt ut på nye rundar med utgreiing.


Med helsing


Sign. Sign. Sign.
Nils Støyva Trond Seth Sveinung Valle Frode Berge
-fylkesleiar i SF- -fylkesleiar i M.- -fylkesleiar i H.- -fylkesleiar i R.-

BOMPENGAR OLDEN – INNVIK.

BOMPENGAR OLDEN – INNVIK.


Framlegg frå Per Kjøllesdal (Sp) /Nils P. Støyva (Ap):

Stryn kommune går inn for å utforme bompengesøknad under føresetnad av at:

A. Bompengeavgifta blir på same nivå som bompengeavgifta i Fatlatunellen – kr. 28,-.
B. Saka må handsamast så fort at det kan pågå kontinuerleg anleggsdrift
fram til ferdigstilling av vegen.
C. Bompengesprosjektet må omfatte heile strekninga Olden-Innvik.
D. Det skal – fram mot k.møtet den 29.06.2010 –
utgreiast nærare mogleghietene for rabattordningar for lokalbefolkninga


Framlegg frå H og Krf:

Stryn kommune går mot at FV 60 Olden-Innvik vert utbetra med bompengefinansiering.
Det er nødvenidg at det vert løyvt offentlege midlar slik at utbetringsarbeidet kan halde fram.


Framlegget til H og Krf fekk 5 røyster og vart vedteke.
Framlegget til Støyva og Kjøllesdal fekk 2 stemmer og vart forkasta.

Rammevilkåra til den kraftforeldande industrien må sikrast.

I vårt fylke er industrien viktig for sysselsettinga og for mange lokalsamfunn. Vi har ein allsidig industri med mange tilsette, i tillegg kjem underleverandørar og alle andre som leverer varer og tenester til desse verksemdene. På mange måtar er mange av desse verksemdene lokomotiv i samfunnet og innanfor enkelte bransjar. Samarbeidskomiteen har tidligare påpeika utfordringane innanfor skipsindustrien.

Ein annan industri i fylket er den kraftforedlande industrien. Nedgangen av industriarbeidsplassar i fylket dei siste åra viser at det er nødvendig å rette fokus mot denne næringa òg. Innanfor den kraftforedlande industrien må vi ha rammevilkår som kan sikre og utvikle verksemdene i fylket.

For å få nye investeringar i denne industrien må det leggast til rette for langsiktige industrikraftkontraktar på same vilkår som fleire EU land allereie har, og få utvida støtteordningar for energieffektivisering. I tillegg må industrien sikrast like CO2 kvotereglar, dette for å unngå karbonlekkasje og auka globale CO2 utslepp, samt konkurranse og kompensasjonsordningar som tilsvarande industrien i EU landa.

Norsk prosessindustri har lågare utslepp enn kva vi finn andre stader i verda. Det er lite klimavenleg dersom aluminiums- eller silisiumforbruket i verda går ned.

Dei største utsleppa i samband med metallproduksjon handlar om kva energikjelder dei brukar. Norsk aluminiumsproduksjon basert på vasskraft slepp ut om lag 1,9 tonn CO2 pr. tonn produsert aluminium. Aluminiumsproduksjon på kolkraft fører til utslepp på heile 15,3 tonn CO2 pr. tonn aluminium.

Vasskrafta er den reinaste industrikrafta, og vi må kunne utnytte dette også i framtida. Vi må også ta vare på den kunnskapen og kompetansen som er tileigna gjennom lang tid her i fylket

Nye investeringar innanfor denne industrien må sikrast.



Helsing Samarbeidskomiteen mellom Sogn og Fjordane Arbeidarparti
og LO i Sogn og Fjordane


Nils P. Støyva
Fylkespartileiar

Arvid Langeland
Los Distriktsekretær

Opning av opplevingspunktet Øvstefoss.

Gamle Strynefjellsvegen er eit over 100 år gammalt veg- og kulturminne. Mellom Skjåk og Stryn var det frå gammalt av fleire kløv- og ridevegar. Det var tungt og det gjekk seint å ta seg fram. I 1881 kom vedtaket om å byggje veg mellom Grotli og Hjelle. Svenske rallarar og bygdefolk frå begge sidene av fjellet var med på det harde anleggsarbeidet. I 1894 stod vegen klar til bruk, som eit meisterverk innan vegbygging og ingeniørkunst.

I 1978 blei Gamle Strynefjellsvegen avløyst av ein heilårsveg med tre tunnelar, men utsyn og vidsyn er det framleis gamlevegen som gir. Naturen er kontrastrik langs strekninga med istida sine avrunda former i aust og ein meir bratt, stupande topografi mot vest.

Gamle Strynefjellsvegen er vinterstengt og opnar i juni. Heilt fram til 1950-talet blei brøytinga av vegen gjort med handmakt. 200 mann spadde seg milevis fram med fleire meter høge brøytekantar bak seg, men det er veghistorie. I dag bles moderne snøfresarar vegen rein for snø på nokre dagar.

Ved Tystigen ligg Stryn Sommarskisenter som hadde sesongopning for tre dagar sidan.

På 1990-talet vart gamle Strynefjellsvegen Nasjonal turistveg. Det vart gjennomført ei rekkje tiltak lang vegen slik at turistane skulle høve til opplevingar langs vegen. Strekninga mellom Grotli og Videsæter er 27 kilometer lang. Seinare er den turistvegen forlenge til Hjelle.

Siste Haust og denne våren har Statens Vegvesen/Nasjonale turistvegar jobba mykje med å legge til rette opplevingspunktet ved Øvstefoss. Denne punktet ligg i Videsvingane nokre hundre meter nedanfor krysset der gamle Strynefjellsvegen tek av.

I dette området renn elva i stride fossar og stryk ned gjennom eit trongt gjøl. Stien ned til dei ulike utsiktspunkta er sikra med om lag 150 meter med rekkverk. Sjølve opplevingspunkta er godt tilrettelagde og trygge. Frå desse opplevingspunkta vil Du kunne sjå den spektakulære Øvstefossen og gjølet vidare nedgjennom elva.


Fredag 28.05.2010 vart den nye attraksjonen offisielt opna. Stryn kommune, Statens Vegvesen og turistnæringa var med på markeringa. Strynebedrifta Stryvo har vore entreprenør på anlegget. Dagleg leiar Jostein Bø var også med på opninga.

Sjå elles denne linken:
http://www.turistveg.no/modules/module_123/proxy.asp?C=89&I=110&D=2


Stryn 30.05.2010.


Nils Støyva

-ordførar-

Slå ring om pappapermisjonen.

Høgre sitt landsmøte vedtok for kort tid sidan å fjerne pappapermisjonen. Tidlegare har Framstegspartiet gått inn for det same. Desse vedtaka er svært skuffande og er eit dramatisk steg i feil retning. Fedrekvoten eller pappapermisjonen er ein rett fedrane har til å ta ut 10 veker permisjon i samband med fødsel. Denne retten har blitt til etter mange år med politisk kamp. Arbeidarpartiet har stått i front for denne kampen.

Denne retten har vore eit viktig bidrag i kampen for likestilling i samfunnet. Den har gjort at fedrane har teke mykje meir ansvar på heimebane noko som tener både far, mor og barn. Fedrepermisjonen er også viktig for likestillinga i arbeidslivet. Difor vil fjerning av fedrekvoten også svekke kvinnene i kampen om likeløn.

Etter mitt syn er det viktig at barnet får oppleve far heime over ein lengre periode. Det er sjølvsagt viktig at far tek ansvar i kvardagen. Men det er ikkje det same som at far er heime på heiltid over ein lenger periode.

Høgre vil ta vekk denne retten fordi familiane skal få større valfridom. Gjennom å auke den såkalla valfridomen, set ein etter mitt syn likestillinga mange tiår tilbake i tid. Noko som igjen fører til at kvinne blir taparar. Arbeidarpartiet vil kjempe mot framlegget frå Høgre. Dette kan ein best gjere ved å slå ring om pappapermisjonen og arbeide for at fedrekvoten vert utvida.

Nils Støyva
-fylkesleiar i Ap-

Jordbruksforhandlingane er viktige.

Under følgjer deler av fråsegna som formannskapet i Stryn gav i samband med jordbruksforhandlingane. Fråsegna med eit tillegg frå frå KRF vart vedteke mot FRP sine stemmer. Underteikna har vore sakshandsamar.

I Stryn kommune og Sogn og Fjordane fylke står landbruksnæringa sterkt. Næringa gjev grunnlag for mange arbeidsplassar og skapar utvikling av nye knytt til m.a. til matproduksjon og foredling, reiseliv og turisme. Fylket marknadsfører seg i nasjonal og internasjonal samanheng som eit fylke med unik natur og eit særskilt kulturlandskap og er difor avhengig av at vi framleis har ei landbruksnæring som pleier dette. Landbruket i Sogn og Fjordane har ein struktur med mange små einingar der det naturlige utgangspunktet gjer at drift og produksjon vert tyngre og meir arbeidskrevjande enn i andre delar av landet.

Stryn kommune ber om at det i jordbruksforhandlingane i 2010 vert teke grep for å sikre
lønsemda i jordbruket i Sogn og Fjordane og dei andre vestlandsfylka. Mjølk og kjøtproduksjon som baserar seg på grovfor er grunnlaget i jordbruket i vår del av landet og verdiskaping og sysselsetting direkte og indirekte er avhengig av gode vilkår for desse produksjonane.

Folketalsauken i verda er stor.Matproduksjonen er for liten til å sikre alle menneske sine grunnleggande behov. Det er viktig at matproduksjonen i vår del av verda vert oppretthalden.

I det føreståande landbruksoppgjeret må økonomien styrkjast særleg gjennom friske midlar men og ved å ta ut auka lønsemd på pris. Begge verkemidela vil vere avgjerande for å løfte inn-tektene i jordbruket til eit akseptabelt nivå. Etterslepet er stort å ta att. For Vestlandet vil det vere avgjerande å styrke driftsøkonomien på dei små einingane også gjennom auka driftstilskot pr bruk. Skal kombinasjonsbonden prioriterast, må ein setje inn friske midlar på
dei første dyra og dei første dekara.

Følgjande må prioriterast i jordbruksoppgjeret:
1. Betre rammevilkår for grovforbasert produksjon ( kjøt og mjølk) i vår del av landet. For Stryn kommune vil det vere avgjerande å betre økonomien i den grovforbaserte produksjonen ved vårens jordbruksoppgjer, og at denne produksjonen vert prioritert og at bruk av utmark og beiting vert belønna. Mjølkeproduksjon har ei avgjerande betydning for at vi framleis skal ha eit levedyktig landbruk i fylket og for at vi framleis skal ha eit velpleia kulturlandskap. Vi ser og med bekymring på at landbruksnæringa ser ut til å flytte seg til andre delar av landet som har betre naturgjevne føresetnader. Resultatet av jordbruksoppgjeret 2010 må vise grep som snur denne utviklinga og gjer det meir lønsamt og attraktivt å drive jordbruksproduksjon i marginale område. Kvoteordninga for mjølk må halde fram og likeeins ordninga med leige av mjølkekvote.

Stryn kommune ber om at:
a) Driftstilskotet i mjølkeproduksjonen på Vestlandet må aukast. Det må opprettast ei eiga
sone for Vestlandet med ein stønad pr bruk.
b) Distriktstilskotet for mjølk i sone D må hevast
c) Distriktstilskote for saue og storfekjøt på Vestlandet må aukast.

Heile saka finn du her:http://www.stryn.kommune.no/innsyn/wfdocument.aspx?journalpostid=2010003879&dokid=138669&versjon=2&variant=A&ct=RA-PDF

Det blir drift på Stryn sommarskisenter denne sesongen.

Sommarskisenteret er viktig for reiselivet i Stryn og Nordfjord. Stryn sommarskisenter er også eit av dei viktigast merkevarenamna i Stryn. Eg er difor glad for at kommunestyret i dag gjorde følgjande samrøystes vedtak:

1. Stryn kommune går inn i det nyskipa eigarselskapet for sommarskisenteret på Strynefjellet/Folven Camping med ein aksjekapital på kr 900.000,-.

2. Det er ein føresetnad for kommunal deltaking i eigarselskapet at det vert skipa eit driftsselskap med målsetting om ein aksjekapital på minimum 2 mill. kr. Det er også ein føresetnad for kommunal deltaking at den skisserte avtalen med bankane fell på plass.

3. Kommunens deltaking , kr 900.000,-, skal finansierast ved bruk av kapitalfondet – konto 25300009.

4. Kommunen si rolle i eigedomsselskapet vert regulert gjennom aksjonæravtale/vedtekter.

5. Formannskapet får fullmakt til å godkjenne vedtekter/aksjonæravtale og til å føreta naudsynte justeringar basert på tilpasningsbehov som måtte oppstå i avslutningsfasen av prosessen.

Hyttebygging ved Stryn Skisenter

Bilde viser skitrekka og hyttefelta ved Bøanedsetra.

Reiselivet er ein viktig del av næringslivet i Stryn kommune. Særleg har sommarturismen hatt mykje å bety for Stryn kommune. Dei siste åra har likevel vinterturismen vakse sterkt. Ein viktig del av denne satsinga er utbygginga av hytter ved Stryn skisenter. Siste året har det blitt bygt meir enn 150 hytter i området. Skal skianlegga og løypene byggast vidare ut, må det meir folk inni området. Vidare tilrettlegging for hyttebygging må difor ha høg prioritet.

Nils Støyva

NM-vinnarar frå Stryn kommune

Under følgjer ei liste over idrettsutøvarar frå Stryn kommune som har vunne NM eller tilsvarande dei to siste år.

Det er også teke med to personar som har flytta ut til andre kommunar.

Johan Eirik Meland
Gull under hovudlandsrennet i skiskyting både i 2009 og 2010.
2.plass i Young Star i Holmenkollen.
2. plass på normaldistansen i hovudlandsrennet i 2009.
1. plass Kvalfosssprinten 2009.

Jarle Midthjell Gjørven
Gull under junior-NM i skiskyting i 2010.
To 4. plassar og ein 5. plasss frå norgescupen i 2010.
7 .plass samanlagt på norgescupen i 2010.
10. plass på junior-NM i skiskyttarsprint i 2010.

Johannes Thingnes Bø
To gull under rulleski-NM 2009.
2.plass i norgescupen i skiskyting i 2010.
Har to 1. plassar og to 2. plassari norgescupen i 2010.

Pål Andre Skrede
1. og 2.- plass i NM i skilfeltskyting i 2010.
2., 11. og 15. plass i norgescupen i skiskyting i 2010.
49. plass i junior-NM i langrenn i 2010.

Helge Hafsås
Helge vart offisiell norsk meister i Ultraløp (6-timersløp) i 2009.
Han vart og den første offisielle norske meistaren på 100 km løp i 2008.
Har pr.dags dato vunne 128 maratonløp (desidert flest i verda) og 14 ultraløp.
Han er innehavar av noregsrekorden på 100 km, den nordiske rekorden på 6-timersløp.

Inger Anne Frøysedal
Gull i innendørs-NM i tresteg i 2010.
Gull i NM i tresteg i 2009 og sølv i 2008.
16. plass i U23 i EM i 2009.
Ho har norgesrekorden i tresteg for 20 åringer.
Inger Anne har berre 44 cm att til norgesrekorden i tresteg på 13.83.
Frå Stryn, men konkurrar no for Tjalve.

Anna Kirsten Hellevang
Gull i NM i skifeltskyting i 2010.
6 gull i NM i skogsløp med skyting på normal og sprint sidan 2005.
Vunne 8 gull i NM skifeltskyting normal og sprint dei siste fire åra.
Gjekk tildlegare for Hardbagg og Rand Skyttarlag. Går no for Omvikdalen skyttarlag i Kvinnherad i Hordaland.

Ivar Ulvedal
Gull på 5 km klassisk i Spesial Olympic Games i 2009.
Sølv på 10 km fri i Spesial Olympic Games i 2009.
Gull på spesial Olypic Games i Holmenkollen i 2010.
Vunne ei rekkje lokale renn.

TARJEI BØ
1 gullmedalje og ein sølvmedalje i senior-NM i skiskyting i 2009
4 gullmedaljar i junior-EM i 2009.
1 gullmedalje junior-EM 2006
2 gullmedaljar junior-NM i langrenn i 2005 og 2006
4. plass verdenscupen før jul i 2009
2 fyrsteplassar og ein andreplass i WCup-stafett i 2010.
OL-gull stafett i Vancuver
Svært spennande stafett i Vancuver
Stor stemning i kulturhuset
Viktig for idretten
Viktig for Stryn kommune
Eit nytt merkevarenamn i indre Nordfjord


Stryn 30.03.2010


Nils Støyva

-ordførar-

Kulturprisen i Stryn til Ol-vinnar Tarjei Bø

Appell i samband med markeringa av OL gull til Tarjei Bø i Stryn sentrum 30.03.2010.

Fylkesordførar, Tarjei Bø, inviterte gjester og idrettsvenner.

I dag er eg ein stolt, glad og kry ordførar. Vi skal markere at Stryn kommune har fått ein gullvinnar i OL. Ein annan som har vunne gull i Spesial Olympic Games, og heile sju idrettsutøvarar frå Stryn kommune som har vunne Noregsmeisterskap eller tilsvarande dei to siste åra.

Idretten har alltid stått sterkt her i indre Nordfjord. I alle grendelag av kommunen har vi aktive idrettslag med mange utøvarar som hevdar seg på nasjonalt toppnivå. Men ikkje minst har vi ein fantastisk breidde og masseidrett i bygdene våre. Halvparten av innbyggarane i fylket er medlem i eit idrettslag. Innanfor det frivillige arbeidet generelt og idretten spesielt blir det lagt ned eit fantastisk dugnadsarbeid. Berre i Stryn kommune er dugnadsarbeid innan idretten stipulert til om lag 60 årsverk. Eit fantastisk tal.
Kva hadde bygdene våre vore utan det frivillige arbeidet?

Utbygginga av dei mange idrettsanlegga i Stryn kommunen er det også grunn til å stoppe opp ved. Her vil eg særskilt drage fram utbyggingane som er gjennomførde av Veten il , Markane il og Stryn turn- og idrettslag. Desse laga har dei siste tiåra vore gjennom ei storstila utbygging av sine idrettsanlegg. Utan desse anlegga kunne vi ikkje fått fram alle desse utøvarane på høgt nasjonalt nivå. Anlegga er sjølvsagt bygde ut for å kunne gjennomføre internasjonale konkurransar.

Også på arrangementsida har idrettslag i kommunen vår utmerka seg på ein svært positiv måte.
Hardbagg il, Veten il , Markane il og Stryn turn- og idrettslag har alle gjennomført store nasjonale og internasjonale arrangement. Junior VM på ski i nordiske greiner er nok det største og mest prestisjefylte arrangementet som har blitt gjennomført til denne tid. Viss eg kjenner idrettslaga våre rett, er eg trygg på at store nasjonale og internasjonale arrangement vil bli gjennomført også i åra framover.

Idrett er også politikk. På nasjonalt nivå vert det i desse dagar brukt store ord om den planlagde samhandlingsreforma. Det blir snakka om at kommunane skal få 20 mrd til å gjennomføre denne reforma. Ein viktig del av reforma er førebyggande og helsefremmande arbeid. I staden for å bruke pengar på å reparere skal vi nytte ressursar på å førebygge. Etter mitt syn er idrett og førebyggande arbeid ein del av same sak. Idrettsrørsla gjer allereie eit fantastisk førbyggande- og helsefremmande arbeid.

Idretten er også ein viktig av våre sosiale aktivitetar og fritidssyslar. Når eg ser utover flokken veit eg at mange av oss – ja kanskje dei fleste- har brukt svært mykje tid på idrettsarbeid. Samfunnet vårt hadde vore mykje fattigare dersom vi ikkje hadde hatt ei så sterk idrettsrørsle i landet vårt. Det gler meg stort å sjå på den fantastiske aktiviteten vi har t.d. har i skiløypene- og bakkane. Eg er sjølvsagt klar over at mange av idrettsbanene og hallane våre har sprengd kapasitet. Trass i ei slunken kommunekasse meiner eg vi må strekke oss langt for å støtte idrettslaga i arbeidet for å kunne auke anleggskapasiteten.

I Stryn har vi opp gjennom åra hatt ei rekkje stor idrettsprestasjonar.Vi hugsar vel alle Per Knut Aaland sine resultat i langrennssportet på 70 og 80-talet. Vi har har hatt topp internasjonale prestasjonar til Tore Andre og Jostein Flo på fotballbana. Men den største idrettprestasjonen fekk vi nok i Vancouver i vinter. Stemninga i kulturhuset under stafetten var til å ta å føle på. Då Tarjei rykka i frå Ørsterike og Russland på siste sløyfa var det som taket ville lette i kulturhuset. Ei stemning og spenning utan sidestykke. Takk skal du ha Tarjei. Du er velkomen heim til Fagre Stryn rett frå Khanty Mansiysk i Sibir. (Foto: Ove Svven)


Stryn 30.03.2010

Nils Støyva-ordførar-